Sitiyasyon moun ki te viktim inondasyon nan depatman Nòdwès la parèt pi konplike yon mwa aprè.
Nan lanwit 22 pou rive 23 desanm 2024 yon gwo lapli te tonbe sou tout depatman Nòdwès sa ki ta pwal lakoz gwo inondasyon nan plizyè komin nan depatman an tankou : Port -de -Paix, Saint Louis du Nord , Anse-à-Foleur, Chansolme ak Jean-Rabel. Te gen anviwon 13 moun mouri pami yo 7 fanm ak tifi epi 6 gason, plizyè dizèn kay ak biznis inonde, te genyen lòt ki kraze nèt, majorite wout ki relye komin yo koupe, anpil bèt peyizan yo mouri, jaden menm se pa pale daprè sa direktris MCFDF la fè konnen nan yon rapò li drese, gen anviwon 1050 moun ki te oblije deplase al viv nan kèk abri provizwa aprè dlo te fin inonde lakay yo.
Pami moun sa yo gen granmoun, timoun, fanm ansent tankou andikape, malgre plizyè rankont ki te fèt antre diferan otorite nan vil yo sitou nan Pòdepè akonpagnye sekretè deta kolektivite teritoryal yo, M. Patrick Sully Joseph pou gade nan ki nivo leta santral te ka akonpagnye popilasyon Nòdwès la ki viktim swit ak inondasyon an, ebyen jiska prezan viktim yo pa janm jwenn akonpanyeman leta santral andeyò de kèlke kit direksyon ministè kondisyon fanm Nòdwès la ak mèri a te distribye bay nan kèk abri san n pa bliye proteksyon sivil te bay kèlke sak diri nan kèk abri. Men problèm reyèl yo rete san touche, pòdepè rete yon vil ki pa janm gen bon drenaj ki fèt ladanl.
Politològ Fertil Modelet ki se pitit otantik Nòdwès ap mande dirijan nan gouvènman an pou fè prèv yo etanke responsab, yon mwa aprè gwo inondasyon sa a nan depatman an ki koute lavi pou piti 13 pitit Nòdwès, ankenn travay pa janm fèt nan kanal yo ki bouche, ankenn pase men pa fèt nan wout yo ki koupe, anyen pa fèt nan pye plizyè pon ki andomaje ki reprezante yon lòt gwo menas pou lavi abitan nan depatman an.
Jounalis la mande pou leta aji rapid vit pou ede plizyè dizèn moun ki dekapitalize, timoun ki viktim yo pako ka repran chimen lekòl paske yo pèdi tout sa yo te genyen swit ak gwo inondasyon sa a ki te frape depatman Nòdwès la. Richès peyizan an se zannimo yo ak jaden yo, jodi a moun yo pèdi tout, yo lage 2 bwa balanse ,viktim yo ap mande leta sipò pou
yo ka rekanpe epi kontinye viv lavi a.
Politològ la mande dirijan yo trete tout moun menm jan, Nòdwès se yon depatman tankou tout lòt depatman, li fè pati peyi a, dirijan yo dwe pitit Nòdwès tout sipò ka yo merite nan tout moman sitou lè yo viktim anba katastròf natirèl. Nòdwès pa ka kontinye ap trete an paranpov paske l se yon depatman istorik, touristik ak mistik e l fè pati depatman ki fè peyi a. Li merite pi bon tretman mesye dirijan yo.
Modelet Fertil
