Nan sans sa, nou te rankontre lenguis, Nissi Gabriella JEAN, responsab Platfòm Koze Gab, pou yon ti batbouch sou inisyativ sa limenm ak tout rès ekip la rive pran. An nou suiv yon enntèvyou jounal La Ruche te reyalize ak li.
Frantzley VALBRUN : Nissi Gabriella JEAN, ou se lengis, responsab Platfòm Koze Gab, pale nou plis de ou, di nou kiyès ou ye ?
NGJ : Mwen se anseyan lang, pasyone kreyolistik epi militan pou lang kreyòl an patikilye. Mwen fè 4 ane lisans yo nan Fakilte Lenguistik Aplike (FLA-ILA). Suit a konkou tradiksyon an kreyòl Ak endepandans peyi a ansanm avèk diskou Dessalines nan rektora Inivèsite Leta a te òganize a, yon konkou m te soti premye loreya fanm ladann, mwen te lanse platfòm koze_gab la pou ede popilasyon Ayisyèn nan aprann e konprann plis sou sa k ap pase nan lang nan.
FV : Koze Gab lanse yon « fòmasyon sou règ ak ekriti kreyòl ayisyen an », di nou plis sou inisyativ sila?
NGJ : Se yon fòmasyon ki gen pou objektif ede piblik la ekri byen oswa pi byen kreyòl ayisyen an. Nou tout pale kreyòl men se pa nou tout ki toujou jwenn yon fòmasyon sou sa. Ekip la mobilize tout konpetans li nan domèn nan pou bay patisipan yo bon jan zouti k ap ede yo non sèlman konprann fenomèn yo men aprann aplike yo kòmsadwa tou.
FV : Poukisa yon inisyativ konsa ?
NGJ : Nou twouve gen anpil mank bò kote lokitè ayisyen yo nan jan yo ekri. Nou konte ede pi plis moun nou kapab nan sans sa a.
FV : Konbyen moun nou konte genyen, e ki mwayen pou yon moun rive enskri ?
NGJ : Nòmalman, se yon fòmasyon ki pou tout popilasyon an. Men nou t ap renmen reyini omwen yon 50èn moun paske n pa konn pou kilè n la ankò.
FV : Ki piblik nou vize pou patisipe nan aktivite sa ?
NGJ : Depi moun nan abitye ekri deja li ka patisipe. Kit li timoun, jèn oswa granmoun.
FV : Pratikman, “Koze_gab” se yon platfòm k ap fè pwomosyon pou Lang Kreyòl sitou travay sou règ ak estrikti lang lan. Men konbyen tan nou genyen depi n ap fè travay sa yo?
NGJ : Nou gen egzakteman 6 mwa depi nou lanse platfòm nan, men temwanyaj sou travay la ak enfliyans nou trè konsiderab. Dayè, se sou demann piblik la nou pote fòmasyon sa a.
FV : Ki lòt aktivite nou abitye fè deja ?
NGJ : Se premye aktivite nou an prezansyèl. Pa kont, nou fè konferans anliy, nou fè kwiz pou kado chak dènye vandredi nan mwa yo tou.
FV : Di nou non, nan fòmasyon sa n ap òganize a, ki lòt aktivite k ap gen ladan l?
NGJ : Ap gen moman echanj chak jou pandan 30 minit sou kèlkeswa difikilte patisipan yo genyen sou yon fenomèn lenguistik kèlkonk, ap gen jwèt tradisyonèl nan moman poz yo epi ap gen yon konferans-deba dènye jou fòmasyon an avèk yon doktoran nan domèn lenguistik.
F.V : Èske yon moun ki maton deja nan Lang lan ka patisipe ?
NGJ : Wi paske m pa panse si yon moun pa lenguis li ka gen yon kantite konesans sou kreyòl ayisyen an piske lang nan vyèj.
FV : Ki enterè yon moun ki pa maton nan Lang lan genyen pou li suiv yon fòmasyon konsa ?
NGJ : Fòmasyon sa a ap ba nou tout baz règ gramè lang nan k ap ede nou metrize l byen epi l ap mete nou anfas reyalite ki travèse diferan fenomèn lenguistik ki egziste ladann yo.
FV : Ki enstans ki sipòte aktivite a ?
NGJ : Bibliothèque Michèle Tardieu sèlman m ka di paske se yo ki mete lokal la disponib pou nou. Apre sa se mwen k jere tout bagay poukont mwen.
FV : Raple nou ankò, nan ki espas, ki jou ak ki lè fòmasyon an ap òganize ?
NGJ : Fòmasyon an ap fèt nan « Bibliothèque Michèle Tardieu » a ki Petyonvil, lendi 5 Out pou rive samdi 31 Out 2024, soti 10è nan maten rive 2è nan laprèmidi.
